Perpekto

Ang hirap maging perpekto. Noong isang taon, asar ako sa mga taong perpekto. Bakit ba kasi kailangan punahin ang tuldok? Bakit hindi pwedeng patawarin ang simpleng pagkakamali? Para sa akin, napakababaw nilang tao.

Pagkatapos ng isang taon, dinagsa ako ng mga perpektong tao. Noong nakita ko si Donemark,nabuo ang loob kong maging abogado. Hindi naman pala kasi lahat ng abogado mayabang. Meron palang abogadong galing UP na may Diyos. Mabait na asawa, mapagpasensiyang tao.

Dumaan ang anim na buwan, nakilala ko si ESB. Pwede palang makatapos ang estudyanteng nagtatrabaho. Valedictorian siya sa Mindoro. Noong kinuha niya Economics sa Ateneo at law sa UP, working student siya. Galing siya sa hirap, at hindi pa rin niya kinakalimutan mga pinaghirapan niya. Sobra pa rin siya magtipid. Notebook niya, cartoon characters, ballpen niya, Panda.

Ilang linggo pa lang ang nakakaraan noong unang beses kami nag-usap ni PTL. Hindi kagaya ni Donemark at ESB, hindi siya dumaan sa hirap. Pero siya lang ang babaeng international partner sa amin. Filipino-Chinese siya, maraming koneksyon, mabusisi, hindi basta-basta nagkakamali sa kabila ng katandaan.

Ngayon, pinpilit nila akong maging perpekto kagaya nila.

Pinapapaniwala nila ako na magiging matagumpay ako kung pipilitin kong maging perpekto. Siguro, ang mga abogado, gutom sa asenso kaya hindi nagtatagal, nagiging perpekto rin sila. Hindi ako naiinggit. Sa totoo lang, hanga ako sa kanila. Pero hindi ako magiging ganun. Siguro hindi dahil sa takot akong subukan, pero sa nakikita ko ngayon, hindi ako magiging masaya sa buhay perpekto. Hindi ko alam kung masaya sila ngayon sa ginagawa nila. Sana oo, para hindi naman sayang ang oras na meron sa kanila.