Bumaba ang Buwan

Bumaba ang buwan upang matumbasan ang init ng araw
Upang ang hatinggabi ay mabalot ng kaligayahan
Nang ang hinagpis ay magtago sa kalawakan

Bumaba ang buwan para yumuko at magpakumbaba
Para burahin ang mga lihim na bangungot
Upang magbantay sa aking pagtulog

Bumaba ang buwan nang hindi ako mangawit maningala
At ang mapanglaw nitong liwanag ay dagliang nambulag
Nang bigla nitong titigan ang luhaan kong mga mata

Bumaba ang buwan mula sa tuktok ng pagdurusa
At samahan ako sa hikbi ng aking pag-iisa
Bumaba ang buwan upang magsanib kaming dalawa

Ngunit unti-unting umapoy nang kami'y magyakap
Kami ay napaso sa init ng aming katawan
At nagsumiklab ang katotohanang hindi kami handa